Est Pasca, sa Pasca ’e su Segnore
chi at cumpridu passione e morte
pro dare vida a su creadu umanu
in su caminu de sa paghe sua.
Tue, Sardigna, pro sa gherra anzena
ses de séculos, cantos!, incravada
a sàmbene falendhe in donzi mermu
in su caminu de sa morte tua.
Ses limúsinas solu suspirendhe,
pro su sidi ’e sa morte solu aghedu,
a bider si ses bia una lantzada,
a limba lada, apenas piulendhe.
Pentimentu de Giudas no s’intendhet
ne làgrimas de Pedros: ses dinaris
current in manu de fartzos messias,
pastores fartzos e Póntzios Pilatos.
Cristos Segnore, tene piedade,
atzèndhennos su coro cun sa mente
pro ndh’iscravare sa Sardigna nostra
in su caminu de sa libbertade!
(mp)